އިންޑިޔާ ކަނޑުގެ ސަރަޙައްދުގެ ސަލާމަތާއި ރައްކާތެރިކަން ދެމެހެއްޓުމަށްޓަކައި ސަރަޙައްދީ ގުޅުންތައް އިތުރަށް ވަރުގަދަކުރުމަށް ނައިބު ރައީސް ފައިސަލް ނަސީމް ގޮވާލައްވައިފި އެވެ.

ނައިބު ރައީސް މިކަމަށް ގޮވާލެއްވީ އިންޑިއަން އޯޝަން ކޮންފަރެންސް (އައިއޯސީ) ގެ 5 ވަނަ ބައްދަލުވުން 2021 އިފްތިތާހުކުރުމުގެ ބައްދަލުވުމުގެ ޝަރަފުވެރި މެހެމާނެއްގެ ގޮތުގައި ބައިވެރިވެވަޑައިގެން ދެއްކެވި ވާހަކަފުޅުގަ އެވެ.

އަބޫދާބީގައި އިއްޔެ ފެށި ދެ ދުވަހުގެ މި ކޮންފަރެންސްގެ ޝިއާރަކީ "އިންޑިއަން އޯޝަން: އިކޮލޮޖީ، އިކޮނޮމީ އެންޑް އެޕިޑެމިކް" މި ޝިއާރެވެ.

މި ބައްދަލުވުމުގައި ނައިބު ރައީސް ދެއްކެވި ވާހަކަފުޅުގައި، އިންޑިޔާ ކަނޑުގެ ސަރަޙައްދަކީ، ރާއްޖޭގެ އިގްތިސާދީ ދުޅަހެޔޮކަމާ ސީދާ ގޮތުން ގުޅިފައިވާ މުހިންމު ވިޔަފާރީގެ ހަބެއްކަން ފާހަގަކުރައްވަމުން، މި ސަރަޙައްދުގެ ސަލާމަތާއި ރައްކާތެރިކަމަށް ރައީސް އިބްރާހީމް މުހައްމަދު ސޯލިހާއި އެމަނިކުފާނުގެ ސަރުކާރުން ވަރަށް ބޮޑު އިސްކަމެއް ދެއްވާ ކަމުގައި ވިދާޅުވި އެވެ. އަދި އެއީ ރައީސްގެ ޚާރިޖީ ސިޔާސަތުގެ އެޖެންޑާގައި ހިމެނޭ އެންމެ މުހިންމު އެއްބައިކަން ވެސް އެމަނިކުފާނު ފާހަގަކުރެއްވި އެވެ.

އަދި، ބޯޑަރު ހުރަސްކޮށް ހިންގާ ޓެރަރިޒަމާއި، ކަނޑުފޭރުމާއި، މަސްތުވާތަކެތީގެ ވިޔަފާރިއާއި މީގެ އިތުރުން މޫސުމަށް އަންނަ ބަދަލުތަކާއި، ސައިބަރ ސެކިއުރިޓީއާއި، އިންސާނީ ވަގުފާރި ފަދަ ނުރައްކާތައް އިތުރުވަމުން ދިއުންފަދަ ކަންކަމަކީ ސަރަޙައްދީ އަދި ބައިނަލްއަގުވާމީ ހުރިހާ ބައިވެރިންގެ އެއްބާރުލުމާއި އެހީތެރިކަން ބޭނުންވާކަންތައްތައްކަން ނައިބު ރައީސް ފައިސަލް ފާހަގަ ކުރެއްވި އެވެ. އަދި އިންޑިއާ ކަނޑުގެ ސަރަހައްދުގެ ސަލާމަތާއި ރައްކާތެރިކަން ކަށަވަރުކުރުމަކީ އެއްވެސް ގައުމަކަށް އެކަނި މަސައްކަތްކޮށްގެން ކުރެވޭނެ ކަމެއް ނޫންކަން ވެސް ނައިބު ރައީސް ފާހަގަކުރެއްވި އެވެ.

އިންޑިއަން އޯޝަން ކޮންފަރެންސްގެ ބައްދަލުވުމުގައި ނައިބު ރައީސް ފައިސަލް ވާހަކަދައްކަވަނީ. ފޮޓޯ: ރައީސް އޮފީސް

އަދި، ކޮވިޑް-19 ގެ ރާއްޖޭގެ މިހާރުގެ ހާލަތާ ބެހޭ މަޢުލޫމާތު

ވެސް ނައިބު ރައީސް ވަނީ މި ބައްދަލުވުމުގެ ބައިވެރިންނާއި ހިއްސާ ކުރައްވާފަ އެވެ. އެގޮތުން ރާއްޖޭގެ ބޯޑަރު ފަތުރުވެރިންނަށް ހުޅުވާލައި، ރާއްޖެއަށް ކޮންމެ ވެސް މިންވަރަކަށް އާންމު ހާލަތަށް އާދެވިފައިވާކަން ފާހަގަކުރައްވައި އެކަންކަން ހާސިލުވީ ދުރާލާއި ސިއްހީ ގަވާޢިދުތައް ހަރުދަނާކޮށް ވެކްސިން ކެމްޕޭން ބާރަށް ކުރިއަށް ގެންދިއުމުން ކަމަށް އެމަނިކުފާނު ވިދާޅުވި އެވެ. އެގޮތުން ތަފާތުކުރުމެއް ނެތި ކޮންމެ ރައްޔިތަކަށް ވެސް ވެކްސިން ލިބޭނެ ގޮތަށް އޮތުމަކީ ކޮވިޑް-19 ކޮންޓްރޯލް ކުރުމަށް އެންމެ މުހިންމު އެއްކަންތައްކަން ފާހަގަކުރައްވައި ރާއްޖޭގެ ކޮންމެ ރައްޔިތަކަށް ވެސް އެއްވެސް ތަފާތުކުރުމެއް ނެތި ހަމަހަމަ ކަމާއެކު ވެކްސިން ލިބުމުގެ މަގުފަހިކޮށްދީފައިވާކަން ފައިސަލް ފާހަގަކުރެއްވި އެވެ.

ދެމެހެއްޓެނިވި ތަރައްޤީގެ ދާއިރާގެ އ.ދގެ އެޖެންޑާ 2030 ގެ ލަނޑުދަނޑިތައް ޙާޞިލު ކުރުމުގެ މުހިންމުކަމުގެ މައްޗަށް އަލިއަޅުއްވައިލައްވަމުން، މުއްސަނދިންނާއި ފަގީރުންގެ މެދުގައި އޮންނަ ފަރަގު ކުޑަކުރުމަށް މަސައްކަތްކުރުމުގެ މުހިންމުކަން ނައިބު ރައީސް ފާހަގަކުރެއްވި އެވެ.

ނައިބު ރައީސް ފައިސަލްގެ ވާހަކަފުޅުގައި، ދެ ފަރާތައް ވެސް ފައިދާގޮތަށް ސަރަޙައްދީ ވިޔަފާރި ކުރިއެރުވުމާއި ދެފަރާތަށް ވެސް ފައިދާހުރި ފޮރިން ޑައިރެކްޓް އިންވެސްޓްމަންޓްތައް ކުރިއެރުވުމަށާއި އަދި ހިންގުމުގެ ނިޒާމުތައް ހަރުދަނާ ކުރުމަށް އެއްޤައުމުން އަނެއް ގައުމަށް އެއްބާރުލުންދިނުމުގެ މުހިންމުކަން ފާހަގަކުރެއްވި އެވެ.

މީގެ އިތުރުން، މޫސުމަށް އަންނަ ބަދަލުތަކާ ބެހޭގޮތުންނާއި، އދ.ގެ 26 ވަނަ ކްލައިމެޓް ޗޭންޖް ކޮންފަރެންސް އޮފް ދަ ޕާޓީސް (ކޮޕް26)ގެ ނިންމުންތަކުގެ މައްޗަށް ވެސް ނައިބު ރައީސް އަލިއަޅުވައިލެއްވި އެވެ. އެގޮތުން ރާއްޖެއަކީ ޖައްވު ހޫނުކުރާ ވިހަ ގޭސްތައް ނިސްބަތުން މަދުން ބޭރުކުރާ ގައުމެއް ނަމަވެސް ޖައްވަށް ބޭރުކުރާ ވިހަ ގޭސްތަކުގެ ސަބަބުން މޫސުމަށް އަންނަ ބަދަލުތަކާއެކު އެންމެ ބޮޑެތި ގެއްލުންތަކާއި ކުރިމަތިލާންޖެހޭ ކުދި ޖަޒީރާ ގައުމުތަކުގެ ތެރޭގައި ރާއްޖެ ހިމެނޭކަން އެ މަނިކުފާނު ފާހަގަކުރެއްވި އެވެ.

ނައިބު ރައީސްގެ ވާހަކަފުޅުގައި މިއީ ވަރަށްބޮޑު ބޭ އިންސާފު ކަމެއްކަން ފާހަގަކުރައްވައި މިއީ މިކަންކަމަށް ފިޔަވަޅުތައް އަޅަންޖެހޭ ވަގުތުކަން ފާހަގަކުރެއްވި އެވެ.

އިންޑިއަން އޯޝަން ކޮންފަރެންސްގެ ބައްދަލުވުމުގައި ނައިބު ރައީސް ފައިސަލް ބައިވެރިވެވަޑައިގަންނަވަނީ. ފޮޓޯ: ރައީސް އޮފީސް

ނައިބު ރައީސް ފައިސަލް ވަނީ ރާއްޖެއިން 2030 ވަނަ އަހަރު އަންނަންވާއިރަށް ނެޓް ޒީރޯ ހާސިލްކުރުމަށް ކުރާ މަސައްކަތާއި ކުނި މެނޭޖްކުރުމާއި އިޔާދަކުރަނިވި ހަކަތައިގެ ވަސީލަތްތައް ތަރައްޤީކުރުމަށް މަސައްކަތްކުރުމާއި، ކަނޑުތަކާއި ފަޅުތަކާއި ކުޅިތައް ހިމާޔަތްކޮށް ނޫ އިގްތިސާދެއް ކުރިއެރުވުމަށް ކުރަމުންދާ މަސައްކަތްތައް ފާހަގަކުރައްވާފަ އެވެ.

ނައިބު ރައީސްގެ ވާހަކަފުޅު ނިންމަވާލައްވަމުން އެމަނިކުފާނު ވަނީ ދުނިޔޭގެ އެހެން ގައުމުތަކުން ވެސް މިކަންކަމަށް ފިޔަވަޅުތައް އެޅުމަށް ގޮވާލައްވާފައެވެ.

އިންޑިއާ ފައުންޑޭޝަނުން އިންތިޒާމްކޮށްގެން ބާއްވާ "އައިއޯސީ. 2021" ރަސްމީކޮށް އިފްތިތާހުކޮށްދެއްވީ އިންޑިއާގެ އެކްސްޓަރނަލް އެފެއާޒް މިނިސްޓަރު އެސް. ޖަޔަޝަންކަރެވެ.