ށ. ފޭދޫގެ ބަނދަރަށް ގެންނަން ބޭނުންވާ ބަދަލުތައް އެ ރަށު ކައުންސިލުން ސަރުކާރަށް ހުށަހަޅައިފި އެވެ.

ފޭދޫ ކައުންސިލުން މިގޮތަށް ސަރުކާރަށް ހުށަހެޅީ އެރަށު ކައުންސިލުންގެ މެމްބަރުން ނައިބު ރައީސް ފައިސަލް ނަސީމާއެކު މިއަދު ރައީސް އޮފީހުގައި ބޭއްވި ބައްދަލުވުމެއްގަ އެވެ.

މި ބައްދަލުކުރެއްވުމުގައި އެ ރަށުގެ ތަރައްގީއަށް އެންމެ މުހިންމުކޮށް ބޭނުންވާ ކަންކަމާ ގުޅޭގޮތުން އެރަށު ކައުންސިލަރުން ނައިބު ރައީސާއެކު މަޝްވަރާ ކުރައްވާފައިވެ އެވެ. އެގޮތުން ކައުންސިލް އިދާރާގެ އިދާރީ މުވައްޒަފުންގެ ދަތިކަމާއި، ބަނދަރަށް ގެންނަން ބޭނުންވާ ބަދަލުތަކާއި، ސްކޫލުގެ ޖާގައިގެ ދަތިކަމުގެ މައްސަލަ އާއި ރަށުގެ ޒުވާނުންނަށް ފުޓްބޯޅަ ދަނޑެއްގެ މުހިންމުކަމާއި، ފެރީގެ ނިޒާމުގެ ޚިދުމަތް ރަނގަޅު ކުރުމަށް ބޭނުންވާ ކަންކަމާއި އަދި ރަށްގިރުމުގެ މައްސަލައިގެ އިތުރުން ފުލުހުންގެ ޚިދުމަތް ފަދަ ރަށަށް ބޭނުންވާ މުހިންމު ޚިދުމަތްތަކާއި ރަށުގެ އިޖްތިމާއީ އަދި އުމްރާނީ ތަރައްގީއަށް ބޭނުންވާ މުހިންމު ކަންތައްތައް ހިމެނެ އެވެ.

މި ބައްދަލުކުރެއްވުމުގައި ނައިބު ރައީސް ދެއްކެވި ވާހަކަފުޅުގައި ލާމަރުކަޒީ ގާނޫނުގެ ދަށުން ކައުންސިލުތަކަށް ލިބިދީފައިވާ ބާރާއި އިޚްތިޔާރުގެ ދަށުން ކަންކަން ނިންމުމުގައި އިތުރު ފަސޭހަތަކެއް ލިބިދީފައިވާކަން ފާހަގަކުރެއްވި އެވެ.

ނައިބް ރައީސް ފައިސަލް ވަނީ ރަށުގައި މިހާރު ވެސް ހުރި ވަސީލަތްތައް އެންމެ ފުރިހަމަގޮތުގައި ބޭނުންކުރުމަށް މަސައްކަތް ކުރުމަށާއި އަދި ރަށުގައި ހުންނަ ކްލަބް ޖަމިއްޔާތައް ފަދަ ފަރާތްތަކާ ގުޅިގެން އާއްމުން ހޭލުންތެރިކަމަށާއި މުޅި މުޖުތަމައުގެ ދުޅަހެޔޮކަމަށް ޕްރޮގްރާމްތައް ހިންގައި މަޢުލޫމާތު ދިނުން ފަދަ ހަރަކާތްތައް އިތުރުކުރެއްވުމަށް ކައުންސިލަރުންގެ ކިބައިން އެދިވަޑައިގެންފަ އެވެ.

މީގެ އިތުރުން އެމަނިކުފާނު ވަނީ ރަށުގެ ކައުންސިލުން އެދިވަޑައިގެންނެވި ކަންކަން ހައްލުކުރުމުގައި ސަރުކާރުގެ ކަމާގުޅޭ އިދާތަކާ ގުޅިގެން މަސައްކަތް ކޮށްދެއްވާނެ ކަމަށާއި އަދި މަޝްރޫއުތަކުގެ މަސައްކަތް ކުރިޔަށްދާ ސްޕީޑް އަވަސްކުރުމަށް ކުރެވެންހުރި ކަންކަން ސަރުކާރުން ކޮށްދެއްވާނެކަމުގެ ޔަގީންކަން ކައުންސިލަރުންނަށް ދެއްވާފަ އެވެ.