ފެނަކަ ކުންފުންޏަށް މަހަކު ޖުމްލަ 213 މިލިޔަނެއްހާ ރުފިޔާ ލިބޭއިރު އިތުރަށް 85 މިލިޔަން ރުފިޔާ ޚަރަދުކުރަންޖެހިފައިވާ ކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރު މުއާޒް މުހައްމަދު ރަޝީދު ވިދާޅުވެއްޖެ އެވެ.

މުއާޒު މިފަދައިން ވިދާޅުވީ ބުރާސްފަތި ދުވަހުގެ ރޭ ދައުލަތުގެ މީޑިއާއިން ގެނެސްދިން ރާއްޖެމިއަދު ޕްރޮގްރާމުގައި ވާހަކަ ދައްކަވަމުންނެވެ.

ފެނަކައިގައި މިވަގުތު ހުރި ބޮޑެތި ދަރަނިތަކާއި ގުޅުވައި ކަންބޮޑުވުންފާޅުކުރައްވައި އެވާހަކަތައް ހިއްސާ ކުރައްވަމުން މުއާޒް ވިދާޅުވީ ނިމިދިޔަ ސަރުކާރުން ކުންފުންޏަށް ނުކަތާވަރަށް މުވައްޒަފުން ނަގާފައިވާ ކަމަށާއި އެގޮތުން ފެނަކައަށް ލިބޭ އާމްދަނީގެ 38 އިންސައްތަ ޚަރަދުކުރަން ޖެހެނީ ތަނުގެ މުވައްޒަފުންގެ މުސާރައަށް ކަމަށެވެ.

އަދި ކުންފުނީގެ އާމްދަނީ 28 އިންސައްތައަށް ކުޑަކުރެވިގެން ނޫނީ ދަރަނިތައް ކުޑަކުރުމަށް ހައްލު ނުލިބޭނޭކަމަށް މުއާޒް ވިދާޅުވި އެވެ.

މީގެ އިތުރުން ބޮޑެތި ލޯނުތައް ނެގުމާއި ނުދައްކާހުރި ތެޔޮ ބިލުތަކަށް ކޮންމެ މަހަކު ބޮޑު ހޭދައެއް ކުރަންޖެހޭ ކަމަށާއި އެގޮތުން ކުންފުންޏަށް މަހަކު ޖުމްލަ 213 މިލިޔަނެއްހާ ރުފިޔާ ލިބޭއިރު އިތުރަށް 85 މިލިޔަން ރުފިޔާ ޚަރަދުކުރަންޖެހިފައިވާ ކަމަށް އޭނާ ވިދާޅުވި އެވެ.

"ކުންފުނީގެ މުވައްޒަފުން މިވަނީ އޯވާ ސްޓާފްވެފަ. ބޭނުން ނުވާ މިންވަރަށް ކުންފުންޏަށް މުވައްޒަފުން ވައްދާފަ ތިބީ. ލިބޭ އާމްދަނީގެ 38 އިންސައްތަ ހޭދަކުން މިޖެހެނީ ހަމައެކަނި ތަނުގެ މުވައްޒަފުންނަށް." މުއާޒް ވިދާޅުވެފައިވެ އެވެ.

މުއާޒް އިތުރަށް ވިދާޅުވީ އައު މެނޭޖްމަންޓް ކުންފުންޏާއި ހަވާލުވެވަޑައިގެންނެވިއިރު ފެނަކައިގެ ދަރަނި 4.3 ބިލިޔަން ރުފިޔާއަށް އަރާފައިވާ ކަމަށެވެ.

މީގެ ސަބަބުން ކުންފުނިން ކުރަންޖެހޭ ޚަރަދުތައް އިތުރުވެ ކުންފުނީގެ މާލީހާލަތު ވަނީ ވަރަށް ބޮޑަށް ދަށްވެފައިކަމަށާއި މިކަން ހައްލުކުރުމަށް ސަރުކާރުން މިހާރު ދަނީ މަސައްކަތް ކުރައްވަމުންކަމަށް ވެސް އޭނާ ވިދާޅުވި އެވެ.

"ވަރަށް ގިނަ ފަރާތްތަކުން އެބަ ވިދާޅުވޭ ފެނަކަ ކުންފުނި އުވާލަން. ކިހިނެއްތޯ މިކަން ކުރަނީ، ފާނޫޒާއި ފުޅިބައްތި ދިއްލައިގެންތޯ ރައްޔިތުން އުޅެން ޖެހޭނީ؟ ނޫން، މިގޮތަށް މިކަމެއް ނުކުރެވޭނެ. ރައްޔިތުންނަށް ވެސް ޚިދުމަތެއް ފޯރުކޮށްދޭން އެބަޖެހޭ." މުއާޒް ވިދާޅުވި އެވެ.

މީގެ އިތުރުން ކުރީ ސަރުކާރުން އެމްއައިބީން ނަގާފައިވާ 400 މިލިޔަން ރުފިޔާގެ ދެ ލޯނު ރިސްޓްރަކްޗާ ކުރުމުގައި މާލީ ވުޒާރާގެ އެހީތެރިކަން ބޭނުންވާކަމަށްވެސް މުއާޒް ވިދާޅުވި އެވެ.

އަދި ސަރުކާރުގެ ކުންފުނިތަކާއި އިދާރާތަކުން ދައްކަންޖެހޭ ފައިސާ މަހުން މަހަށް ލިބޭގޮތް ހެދުމަކީވެސް މުހިންމު ކަމެއްކަމަށާއި މި ހައްލުތަކާއެކު 2027ވަނަ އަހަރާ ހަމައަށް ފެނަކައިގެ ދަރަނި ދައްކައި އެއްކޮށް ނިންމާލެވޭނެ ކަމަށް އޭނާ ވިދާޅުވި އެވެ.