އިޒްރޭލުގެ ޕާސްޕޯޓު މަނާކުރުމުގެ މައްސަލައިގައި އިދިކޮޅު އެމްޑީޕީން މެންބަރުން އެއްބާރުލުން ނުދޭކަމަށް މަޖިލީހުގެ ސަލާމަތާބެހޭ ކޮމެޓީގެ މުގައްރިރު މެންބަރު އޭދަފުށީ ދާއިރާގެ މެމްބަރު އަހުމަދު ސަލީމް ވިދާޅުވެއްޖެ އެވެ.

ސަލީމް މިހެން ވިދާޅުވީ ދިވެހިރާއްޖޭގެ އިމިގްރޭޝަން ގާނޫނަށް އިސްލާހު ގެނައުމުގެ ބިލު ދިރާސާކުރުމަށް މިއަދު ބޭއްވުނު ކޮމެޓީ ބައްދަލުމުގައި ވާހަކަފުޅުދައްކަވަމުންނެވެ.

"މިކަމާ ބެހޭގޮތުން އަޅުގަނޑުމެން ފުދޭވަރަކަށް މަސައްކަތް ކުރެވިއްޖެ. އެކި ފަރާތްކަކަށް ވާހަކަ ދައްކައިގެން ބަޔަކު ގެނެވޭތޯ، އެކުރި މަސައްކަތުގައި މިހާތަނަށް އެއްވެސް ބަޔަކު ގެނެވޭ ގޮތެއް ނުވޭ. އެންމެ ބޮޑަށް މަސައްކަތް ކުރީ މަޓީ ގެނެވޭތޯ. މަޓީ މީހުން އަދި ޖަވާބެއް ނުދޭ، ގެސްޓް ހައުސް އެސޯސިއޭޝަނުން މާދަމާއަށް އޯކޭ ދީފަ އޮތީ. އޭގެ އަނެއް ދުވަހަށް މަޓާޓޯއިން އެއްބަސްވެއްޖެ އަންނާނެ ކަމަށް،" މެންބަރު ސަލީމް ވިދާޅުވި އެވެ.

މި މައްސަލައިގައި އިތުރަށް ވާހަކަ ދައްކަވަމުން ސަލީމް ވިދާޅުވީ އިމިގްރޭޝަން ގާނޫނަށް އިސްލާހު ގެނައުމުގެ މި ބިލަކީ އެމްޑީޕީން ހުށަހެޅީ ބިލަކަށް ވީ ނަމަވެސް މިކަމާ ގުޅިގެން މަޝްވަރާކުރުމަށް ކޮމެޓީއަށް ހާޒިރުވުމާމެދު އެމްޑީޕީން ވެސް ޖަވާބެއް ދީފައިނުވާ ކަމަށެވެ. އަދި އެމްޑީޕީއިން ހުށަހެޅި ބިލަކަށް އެ ޕާޓީގެ ބަހެއް ލިބުން މުހިއްމު ކަމަށެވެ.

އިޒްރޭލް ޕާސްޕޯޓް މަނާކުރުމުގެ މައްސަލަ އަވަސްކުރަން އެމްޑީޕީން އެއްބާރުލުން ނުދޭ މައްސަލައާ ގުޅިގެން 241 ކޮމެޓީގައި ރައްޔިތުންގެ މަޖިލީގެ ހުޅުދޫ ދާއިރާގެ މެންބަރު މުހައްމަދު ޝާހިދު ވިދާޅުވީ އިޒްރޭލުގެ ޕާސްޕޯޓް މައްސަލާގައި 241 ކޮމެޓީން މިއަދު ކަމާ ގުޅުން ހުރި ހުރިހާ ފަރާތްތައް އެ ކޮމެޓީއަށް ހާޒިރުކުރަން އެދިފައިވާއިރު އެމްޑީޕީން ޖަވާބެއް ދީފައި ނުވާ ކަމަށެވެ.

ޝާހިދު ވިދާޅުވީ މި މައްސަލައާ ގުޅިގެން މަޝްވަރާކުރަން ކޮމެޓީން ހުރިހާ ސިޔާސީ ޕާޓީތަކަށް ދައުވަތު ދީފައިވާކަމަށާއި އެންމެ ބޮޑަށް މި މައްސަލާގައި ވަކާލާތު ކުރާކަމަށް ބުނާ އެމްޑީޕީން ޖަވާބެއް ނުދިނުމަކީ އެ ޕާޓީން ދައްކާ ވާހަކަތަކުގެ އިޚްލާސްތެރިކަމެއް ނެތްކަން ހާމަވާ ކަމެއް ކަމަށެވެ.