ފޮރިން މިނިސްޓްރީގައި 129 ސިޔާސީ މުވައްޒަފުން ތިބިކަން ހާމަވެއްޖެ އެވެ.

މައުލޫމާތު ހޯދާ ލިބިގަތުމުގެ ގާނޫނުގެ ދަށުން "މިހާރު" ނޫހުން ހޯދި މައުލޫމާތުން އެނގޭ ގޮތުގައި މިދިޔަ އޮކްޓޯބަރު މަހުގެ ނިޔަލަށް އެ މިނިސްޓްރީގައި ޖުމްލަ 269 މުވައްޒަފުން ތިބި އިރު، އޭގެ ތެރެއިން 129 ސިޔާސީ މުވައްޒަފުންނާއި 140 ފޮރިން ސާވިސް މުވައްޒަފުން އެ މިނިސްޓްރީގައި މަސައްކަތް ކުރަމުންދެ އެވެ.

މި މައުލޫމާތު ހާމަކޮށްފައި މިވަނީ މައުލޫމާތު ހާމަނުކުރުމަށް އެތައް ދުވަހަކު ފޮރިން މިނިސްޓްރީން މަސައްކަތް ކުރުމަށްފަހު އެވެ.

ފާހަގަކޮށްލެވޭ ގޮތުގައި މި އަދަދަކީ ކުރީ ސަރުކާރުގައި ފޮރިން މިނިސްޓްރީގައި ތިބި ސިޔާސީ މުވައްޒަފުންގެ އަދަދަށްވުރެ ގިނަ އަދަދެކެވެ. ކުރީގެ ސަރުކާރުގައި އެ މިނިސްޓްރީގައި ތިބީ 116 ސިޔާސީ މުވައްޒަފުންނެވެ.

މި ސަރުކާރުން ވަނީ ސިޔާސީ މުވައްޒަފުންގެ ސީދާ އަދަދު ސިއްރުކޮށްފަ އެވެ. މިވަގުތު 2000 އަށްވުރެ ގިނަ ބޭފުޅުން ސިޔާސީ މަގާމުތަކުގައި ތިބިކަމަށް މައުލޫމާތު ލިބިފައިވެ އެވެ.