ިންޑިއާ ސަރުކާރުން ހާއްސަ އެއްބަސްވުމެއްގެ ދަށުން ރާއްޖެއަށް ފޮނުވި 70 ޓަނުގެ ހަކުރު ޤާނޫނާ ހިލާފަށް ލަންކާއަށް އެތެރެކުރިކަމަށް ތުހުމަތުކުރެވޭ މައްސަލައެއް އިންޑިއާއިން ތަހްގީގުކުރަން ފަށައިފި އެވެ.

އިންޑިއާގެ ނޫސްތަކުން ރިޕޯޓުކޮށްފައިވާ ގޮތުގައި މި ތަހްގީގު ކުރިއަށް ގެންދަނީ އިޤްތިސޯދީ ކަންކަމާބެހޭ މިނިސްޓްރީގެ ދަށުން ހިނގާ ޑައިރެކްޓަރޭޓް ޖެނެރަލް އޮފް ފޮރިން ޓްރޭޑް (ޑީޖީއެފްޓީ) އިންނެވެ.

އޮކްޓޯބަރު 25 ގައި ރިޕޯޓުކުރެވުނު މި މައްސަލައިގައި ހިމެނެނީ އޭޕްރީލް މަހު ސޮއިކުރެވުނު އެއްބަސްވުމެއްގެ ދަށުން ރާއްޖެއަށް އެކްސްޕޯޓުކުރުމަށް އެއްބަސްވެފައިވާ 64،494.33 ޓަނުގެ އެކި ބާވަތުގެ ކާބޯތަކެތީގެ ތެރެއިން 70 ޓަނުގެ ހަކުރެވެ.

ރިޕޯޓުތަކުގައިވާ ގޮތުން، ޑީޖީއެފްޓީ އިން މި މައްސަލަ ތަހްގީގުކުރަމުންދާއިރު، މިވަގުތު ރާއްޖެއަށް ހަކުރު އެކްސްޕޯޓުކުރުން ވަނީ ހުއްޓާލާފަ އެވެ.

އެ ތަހުގީގުން ހާމަކޮށްފައިވާ ގޮތުގައި އިންޑިއާގެ ނަވާ ޝެވާ ބަނދަރުން ހަތް ޕާރުސަލް ހަކުރު އުފުލާފައިވެ އެވެ. އަދި އިންޑިއާއިން ރާއްޖެއަށް ފޮނުވި ގާތްގަނޑަކަށް 70 ކޮންޓެއިނަރުގެ ހަކުރު ސްރީލަންކާގެ ކަސްޓަމްސްއިން ހިފަހައްޓާފައިވެ އެވެ. މި މުދާ ޓްރާންސިޓްގައި، އަދި ބިލް އޮފް ލޭޑިން ގައި އެންމެ ފަހުގެ މަންޒިލުގެ ގޮތުގައި ބަޔާންކޮށްފައިވަނީ ކޮލޮމްބޯ އެވެ.

އިންޑިއާއިން ވަނީ 2023 ވަނަ އަހަރުގެ ސެޕްޓެމްބަރުން ފެށިގެން 2024 ވަނަ އަހަރުގެ އޮކްޓޯބަރާ ހަމައަށް އާންމުކޮށް ހަކުރު އެކްސްޕޯޓުކުރުން ހުއްޓުވާލާފަ އެވެ. ނަމަވެސް ހާއްސަ އެއްބަސްވުމުގެ ދަށުން ރާއްޖެއަށް ހަކުރު އެކްސްޕޯޓުކުރުމުގެ ހުއްދަ ދީފައިވެ އެވެ.