ގައުމީ އެއާލައިން، އައިލެންޑް އޭވިއޭޝަން ސާވިސް (އައިއޭއެސް) ގެ ޑެޕިއުޓީ މެނޭޖިން ޑިރެކްޓަރުގެ މަގާމުން އައިޝަތު ޖެނިފާ ވަކިކުރީ ގާނޫނާ ހިލާފަށް ކަމަށާއި، އޭނާ އަށް ބަދަލެއްގެ ގޮތުން އެއް މަހުގެ މުސާރަ އާއި އިނާޔަތްތަކަށްވާ 56،000 އަށް ވުރެ ގިނަ ރުފިޔާ އާއި އަލުން ވަޒީފާ ދިނުމަށާއި މައްސަލަ ނިމުނު މުއްދަތާ ހަމައަށް ލިބެންޖެހޭ މުސާރަ އާއި އިނާޔަތްތައް ވެސް ދޭން ވަޒީފާއާ ބެހޭ ޓްރައިބިއުނަލުން އަންގައިފި އެވެ.

އެމްޑީޕީގެ ކުރީގެ ހަރަކާތްތެރިއެއް ކަމަށްވާ ޖެނިފާ އަށް އައިއޭއެސްގެ ޑީއެމްޑީގެ މަގާމު ދިނީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި، ޑިސެމްބަރު 28، 2018 ގަ އެވެ. އޭނާ މަގާމުން ވަކިކުރަން ނިންމީ މި ސަރުކާރު އައުމަށް ފަހު ޑިސެމްބަރު 28، 2023 ގައި ބޭއްވި ބޯޑުގެ ބައްދަލުވުމަކުން ނިންމައި މިދިޔަ ޖެނުއަރީ މަހު އެވެ.

އެ މައްސަލަ ޖެނިފާގެ ފަރާތުން ވަޒީފާއާ ބެހޭ ޓްރައިބިއުނަލަށް މިދިޔަ މާޗު މަހު ހުށަހެޅުމުން، އެ ޓްރައިބިއުނަލުން މި މަހުގެ 13 ވަނަ ދުވަހު ނިންމީ ޖެނިފާ މަގާމުން ވަކިކުރީ ވަޒީފާ އިން ވަކިކުރަން ޖެހޭ ފަދަ ހާލަތެއް މެދުވެރިވެގެން ނޫން ކަމަށާއި އޭނާ ވަކިކުރީ މައުޟޫއީ އަދުލުވެރިކަމާއި އިޖުރާއީ އަދުލުވެރިކަން ގާއިމް ކުރުމެއް ނެތި ކަމަށެވެ. އެހެންވެ ޓްރައިބިއުނަލުން މައްސަަލަ ނިންމާތާ ހަތް ދުވަސް ތެރޭ އޭނާ އަށް އައިއޭއެސްގެ ޑީއެމްޑީގެ މަގާމު ދިނުމަށާއި ވަޒީފާ އިން ވަކިކުރި ތާރީހުން ފެށިގެން ޓްރައިބިއުނަލުން މައްސަލަ ނިންމަން ހޭދަވި މުއްދަތުގައި އޭނާ ވަޒީފާގައި ދެމިހުރެއްޖެ ނަމަ، ލިބޭނެ މުސާރަ އާއި އިނާޔަތްތަކާއި ވަޒީފާގެ ކުރިއެރުންތައް އަދި ވަޒީފާ އިން ވަކިކުރުމުން ލިބުނު މާލީ ގެއްލުމުގެ ބަދަލުގައި ތިން މަހުގެ މުސާރަ ނަގައިދިނުމަށް ނިންމި އެވެ.

އައިއޭއެސްގެ ޑީއެމްޑީގެ މަގާމުގެ މުސާރައިގެ ގޮތުގައި ޖެނިފާއަށް މަހަކު 34،304ރ. ލިބިވަޑައިގެންނެވިއިރު، އެ މަގާމުގެ އެހެން އިނާޔަތްތަކުގެ ގޮތުގައި 21،867ރ. އޭނާއަށް ދިނެވެ. ނަމަވެސް އެ ދުވަސްވަރު ވަނީ ޖެނިފާ އަށް މަހަކު 80 ހާސް ރުފިޔާ ލިބޭ ކަމަށް އަޑުއަރުވައިފަ އެވެ.