އިންޑިޔާއަށް އަޅުގަނޑުމެންގެ މާލީ ހާލަތު ރަނގަޅަށް އެނގޭނެ، އަޅުގަނޑުމެންނަށް ދިމާވާ ގޮންޖެހުންތަކަށް ހައްލު ހޯދުމަށް އެ ގައުމު އަބަދުވެސް ތައްޔާރަށް އޮންނާނެ ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.

އިންޑިއާއަށް ކުރައްވާ ފަސް ދުވަހުގެ ދަތުރުފުޅެއް މިއަދު މެންދުރު ރައީސް މުއިއްޒު ވަނީ ފައްޓަވައިފަ އެވެ.

މިދަތުރުފުޅުގައި އެތައް ސަތޭކަ މިލިއަން ޑޮލަރެއްގެ ބެއިލްއައުޓް ހޯއްދަވާނެ ކަމަށް ބެލެވޭ ކަމަށް ބީބީސީން ބުނެ އެވެ.

ރާއްޖޭގެ ބޭރު ފައިސާގެ ރިޒާވް 440 މިލިއަން ޑޮލަރަށް ދަށަށް ގޮސްފައިވާއިރު، މިއީ ދޮޅު މަހެއްހާ ދުވަހުގެ އިމްޕޯޓަށް އެކަށީގެންވާ މިންވަރެކެވެ.

ވެރިކަމަށް ވަޑައިގެންނެވި ފަހުން އިންޑިއާއަށް ކުރައްވާ ފުރަތަމަ ފުރަމާނަ ދަތުރުފުޅު ކުރިން ބީބީސީއަށް އީމެއިލް މެދުވެރިކޮށް ދެއްވި އިންޓަވިއުއެއްގައި ރައީސް މުއިއްޒު ވިދާޅުވީ ރާއްޖޭ ވަނީ އިގްތިސާދީ ކާރިސާއަކާ ކުރިމަތިލާން ޖެހިފައިވާ ކަމަށާއި އިންޑިއާ އިން އެހީތެރިކަން ފޯރުކޮށްދޭނެ ކަމުގެ ޔަގީންކަން އެބައޮތް ކަމަށެވެ.

https://www.hurihaa.mv/32926

"އިންޑިއާއަށް އަޅުގަނޑުމެންގެ މާލީ ހާލަތު ފުރިހަމައަށް އެނގޭނެ. ތަރައްގީގެ އެންމެ ބޮޑު އެއް ބައިވެރިއެއްގެ ހައިސިއްޔަތުން އަބަދުވެސް އެ ގައުމު އޮންނާނީ އަޅުގަނޑުމެންނަށް ދިމާވާ ގޮންޖެހުންތަކަށް ރަނގަޅު ގޮތްތަކެއް ހޯދުމަށާއި ހައްލު ހޯދަން ތައްޔާރަށް،" ރައީސް ވިދާޅުވި އެވެ.

ތަޖުރިބާކާރުން ފާހަގަކުރާ ގޮތުގައި މުއިއްޒު ދިއްލީއާ މެދު މިހާރު ދައްކަވާ ވާހަކައަކީ މީގެ އަހަރެއްހާ ދުވަސް ކުރިން އިންތިހާބުގެ ކެމްޕޭނުގައި މުއިއްޒު ގެންގުޅުއްވި ވާހަކަތަކާ ވަރަށް ތަފާތު ވާހަކައެކެވެ. އެ ކެމްޕެއިން މައިގަނޑު ގޮތެއްގައި އަމާޒުކޮށްފައި ވަނީ "އިންޑިއާ އައުޓް" ސިޔާސަތެއްގެ މައްޗަށެވެ.

އިންޑިއާއާ ދެކޮޅު ކެމްޕެއިނާ ބެހޭ ގޮތުން އެ އިންޓަވިއުގައި ސީދާ ވާހަކަ ނުދެއްކެވި ނަމަވެސް ހިޔާލު ތަފާތުވުންތަކަށް ހައްލު ހޯދޭނީ ހުޅުވާލެވިފައިވާ މާހައުލެއްގައި ވާހަކަދައްކައިގެންކަމުގެ ޔަގީންކަން އެބައޮތް ކަމަށް މުއިއްޒު ވިދާޅުވި އެވެ.

ކުޑަ ޖަޒީރާ ގައުމެއްގެ ހައިސިއްޔަތުން ކާބޯތަކެތީގެ ބާވަތްތަކާއި އުމްރާނީ ތަރައްގީ އާއި ސިއްހީ ފަރުވާގެ ގިނަ ކަންކަމުގައި ރާއްޖެ ބަރޯސާވަނީ ބޮޑު އަވަށްޓެރި އިންޑިއާ އަށެވެ.

މި ދަތުރުފުޅުގައި ރާއްޖެއަށް މާލީ އެއްވެސް އެހީއެއް ދިނުމަށް އެޖެންޑާކޮށްފައިވާކަން ދިއްލީ އާއި މާލެއިން ރަސްމީކޮށް ކަށަވަރުކޮށްދީފައެއް ނުވެ އެވެ. ނަމަވެސް ތަޖުރިބާކާރުން ދެކޭ ގޮތުގައި އެއީ އެ މަޝްވަރާގެ ތެރޭގައި ހިމެނޭނެ ކަމެކެވެ.

"މުއިއްޒުގެ މި ދަތުރުފުޅުގައި އެންމެ ބޮޑު އިސްކަމެއް ދެނީ ހިލޭ އެހީ އަދި ދަރަނި އަނބުރާ ދެއްކުން ރީސްޓްރަކްޗާ ކުރުމަށް މަގެއް ހޯދުން،" ނަން ހާމަ ކުރަން ބޭނުން ނުވާ ރާއްޖޭގެ ސީނިއާ އެޑިޓަރަކު ބީބީސީއަށް ވިދާޅުވި އެވެ.

ރާއްޖެއަށް ކުރިމަތިވެފައިވާ މާލީ ދަތިތަކާ ގުޅޭ ގޮތުން އިތުރަށް ވާހަކަ ދައްކަވަމުން ރައީސް މުއިއްޒު ވިދާޅުވީ، ދަތިތަކުން އަރައިގަތުމަށް އައިއެމްއެފްގެ ޕްރޮގްރާމަކާ ގުޅެން ނުވިސްނާ ކަމަށެވެ. އަދި ވިދާޅުވީ، ރާއްޖެއިން ގެންގުޅޭނީ ރާއްޖޭގެ އަމިއްލަ އެޖެންޑާއެއް ކަމަށެވެ.

ރައީސްގެ ދެކަނބަލުން މިއަދުން ފެށިގެން އަންނަ ބުރާސްފަތި ދުވަހުގެ ނިޔަލަށް ކުރައްވާ މި ދަތުރުފުޅުގައި އިންޑިއާގެ ރައީސް ދުރޫޕަދީ މުރުމޫ އާއި ބޮޑުވަޒީރު ނަރެންދްރަ މޯދީ، އަދި އެ ގއުމުގެ އިސް ވެރިންނާ ބައްދަލުކުރެއްވުމަށް ވަނީ ހަމަޖެހިފަ އެވެ.

އިންޑިއާ ސަރުކާރުން ހަމަޖެއްސި ޚާއްސަ މަތިންދާބޯޓެއްގައި ރައީސް ފުރަތަމަ ވަޑައިގަންނަވާނީ ވެރިރަށް ދިއްލީ އަށެވެ. އިންޑިއާގެ ވެރިރަށުގައި ދިރިއުޅޭ ދިވެހިންނާ ރައީސް މިރޭ ބައްދަލު ކުރައްވާނެ އެވެ. އޭގެ ކުރިން މިއަދު ހަވީރު އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމަނިއަމް ޖައިޝަންކަރާ ބައްދަލު ކުރައްވާނެ އެވެ.

ރައީސަށް އިންޑިއާ އިން ރަސްމީކޮށް މަރުހަބާ ކިޔުން އޮންނާނީ މާދަމާ ހެނދުނެވެ. މި ދަތުރުފުޅުގައި އިންޑިއާގެ ރައީސާއި ބޮޑުވަޒީރު ނަރެންދުރަ މޯދީއާ ވެސް ރައީސް މުއިއްޒު މާދަމާ ބައްދަލުކުރައްވާނެ އެވެ. ރައީސްގެ މި ދަތުރުފުޅުގައި މުމްބާއީ އާއި ބެންގަލޯރަށް ވެސް ވަޑައިގަންނަވާނެ އެވެ.