ކުޑަކުއްޖަކަށް އަނިޔާކުރި މައްސަލާގައި އަންހެނަކު ހޯދަން ފުލުހުން އިއުލާނުކޮށްފި އެވެ.

އެކަމާ ގުޅިގެން ފުލުހުން މިއަދު ކުރި އިއުލާނުގައި ބުނީ އެ މައްސަލާގައި ފުލުހުންގެ އިދާރާއަށް ހާޒިރުކުރަން ބޭނުންވަނީ އުމުރުން 25 އަހަރުގެ ގދ. ގައްދޫ, ދިލާވަރުގެ، ޝަފުރާ އަބްދުﷲ އާދަމް ކަމަށެވެ.

މި މައްސަލައަކީ ގދ. ގައްދޫ ޕޮލިސް ސްޓޭޝަނުން ތަހުގީގު ކުރަމުންދާ މައްސަލައެއް ކަމަށް ފުލުހުން ބުންޏެވެ. އޭނާ ހާޒިރުކުރަނީ ތުހުމަތުކުރެވޭ މައްސަލާގެ ތަހުގީގަށް ސުވާލުކުރުމަށެވެ.

ފުލުހުން ބުނީ ޝަފޫރާ އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ހަވާލުކުރެވިފައި ނުވާ ކަމަށެވެ.

އޭނާ ހޯދުމަށް އިއުލާން ކޮށްފައިވަނީ ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާ ގޮތުގެމަތިން ކަމަށް ފުލުހުން ބުނެ އެވެ.

ދާދިފަހުން ވަނީ އަންހެނަކު ކުޑަ އަންހެން ކުއްޖަކަށް އަނިޔާ ކުރާ ވީޑިއޯއެއް މީސް މީޑިއާގައި އާންމުވެފަ އެވެ. ބައެއް މީހުން ބުނެފައިވާގޮތުން އެ ވީޑިއޯގައި ފެންނަނީ ދޮން މަންމައަކު ދަރިއަކަށް އަނިޔާ ކުރާތަނެވެ.