ކައުންސިލްތަކަށް ސިޔާސީ މުވައްޒަފުން އައްޔަންކުރުން ހުއްޓާލަން މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ސަރުކާރަށް ގޮވާލައިފި އެވެ.

އެމްޑީޕީން މިހެން ގޮވާލާފައިވަނީ ލާމަރުކަޒީ ނިޒާމަށް ހުރަސް އެޅުމަށް ސަރުކާރުން ފާސްކުރަމުންދާ ގާނޫނުތަކާމެދު ކަންބޮޑުވުން ފާޅުކޮށް އެ ޕާޓީން މިރޭ ނެރުނު ބަޔާނެއްގަ އެވެ.

އަތޮޅު ކައުންސިލުތަކާއި ރަށު ކައުންސިލްތަކަކީ އަމިއްލަ ނަމުގައި ދައުވާކުރުމާއި ދައުވާ ލިބިގަތުމުގެ ބާރު ލިބިފައިވާ ވަކި ގާނޫނީ ޝަހްސެއްކަން ދިވެހިރާއްޖޭގެ އިދާރީ ދާއިރާތަށް ލާމަރުކަޒީ އުސޫލުން ހިންގުމުގެ ގާނޫނުގައި ކަނޑައެޅިގެން ބަޔާންކޮށްފައި އޮތްއިރު، ރައީސް މުހައްމަދު މުއިއްޒު އެ ކައުންސިލުތަކަށް ސިޔާސީ މުވައްޒަފުން އައްޔަނުކުރަމުންދަނީ ކަނޑައެޅިގެން ކައުންސިލުތަކުގެ ބާރު ކަނޑުވާލަންކަމުގައި އެމްޑީޕީން ބުނެ އެވެ.

މީގެ އިތުރުން ލާމަރުކަޒީ ގާނޫނުގެ ދަށުން އުފައްދާފައިވާ ކައުންސިލް އިދާރާތަކަށް ސިޔާސީ މުވައްޒަފުން އައްޔަނުކުރުމުގެ ބާރު ރައީސް މުއިއްޒަށް ލިބިވަޑައިނުގަންނުވާ ކަމަށާއި ކައުންސިލް އިދާރާތަކަށް ސިޔާސީ މުވައްޒަފުން އައްޔަނުކުރުން ހުއްޓާލުމަށް އެމްޑީޕީން ގޮވާލާފައިވެ އެވެ.

ލާމަރުކަޒީ ގާނޫނަށް ސަރުކާރުން ގެންނަ އިސްލާހުތަކާއި ގުޅިގެން ކަންބޮޑުވުން ފާޅުކުރަމުން އެމްޑީޕީން ބުނީ، އާބަން ޑިވޮލޮޕްމަންޓް ބިލް ސަރުކާރުން މިހާރު ހުށައަޅަފައިވާ ގޮތަށް ފާސްކުރެއްވިއްޖެނަމަ ލާމަރުކަޒީ އުސޫލުން ރާއްޖެ ހިންގުމަށް ގާނޫނުއަސާސީ އާއި ގާނޫނުތަކުގައި ކަނޑައެޅި މުހިއްމު އަސާސްތައް މުގުރިގެން ދިއުމުގެ ފުރުސަތު ބޮޑުވާނެ ކަމަށެވެ.

އެހެންކަމުން ރައްޔިތުންގެ މަޖިލިހަށް ސަރުކާރުން މިހާރު ހުށަހަޅާފައިވާ ލާމަރުކަޒީ ގާނޫނު ތަންފީޒުކުރުމަށް ހުރަސް އެޅިދާނެ ގާނޫނުތަކާމެދު ރަށު ކައުންސިލްތަކާ، ސިޓީ ކައުންސިލްތަކާ، އަތޮޅު ކައުންސިލްތަކާއި އަދި ގުޅުންހުރި މަދަނީ ޖަމިއްޔާ، ޖަމާއަތްތަކާ، ސިޔާސީ ޕާޓީތަކާއެކު ހުޅުވާލެވިފައިވާ، ބިނާކުރުވަނިވި މަޝްވަރާއަކަށް ދިއުމަށް ވެސް ގޮވާލާފައިވެ އެވެ.

ވަރަށް ގިނަ ރަށްރަށުގައި ސިޔާސީ މަގާމުތަކަށް ބޭފުޅުން އައްޔަންކުރެއްވުމަށްފަހު އެބޭފުޅުން ތިބޭނެ ތަން ކައުންސިލް އިދާރާގައި ހަމަޖެއްސުމަށް ރަށު ކައުންސިލްތަކަށް ސަރުކާރުން އަންގާފައިވާ ކަމަށްވެ އެވެ. މި ސަރުކާރު ފާހަގަވެގެން ދަނީ ކުރީގެ ސަރުކާރުތަކާ އަޅާ ބަލާއިރު ސިޔާސީ މަގާމުތައް ގިނަ ސަރުކާރެއްގެ ގޮތުގަ އެވެ.