ހުޅުމާލޭގައި އިއްޔެ ހިނގި ނުރައްކާތެރި އެކްސިޑެންޓުގައި އަނިޔާވި މީހާގެ ހާލު ސީރިއަސްކަމަށް ފުލުހުން ބުނެފި އެވެ.

އިއްޔެ މެންދުރު ހުޅުމާލެ ފޭޒް ދެއެއްގައި، މަގުގެ އެއްފަރާތުގައި ސައިކަލުގައި މަޑުކޮށްގެން އިން މީހެއްގެ ގައިގައި ކޮންޓްރޯލް ނުވެގެން ދިޔަ ކާރަކުން ޖެހި ހިނގި އެކްސިޑެންޓްގައި އަނިޔާވި މީހާގެ މައިބަދާގައި ރެނދުލައި އެތަށް އަނިޔާއެއް ލިބި ހާލު ސީރިއަސް ކަމަށް ފުލުހުން ބުނެފި އެވެ.

ފުލުހުން މިހެން ބުނެފައިވަނީ އެކްސިޑެންޓްވި ކާރުގައި ތިބި މީހުންގެ ބަންދާއި މެދު ގޮތެއް ނިންމުމަށް މިއަދު ކްރިމިނަލް ކޯޓުގައި ބޭއްވި ޝަރީއަތަށް ފުލުހުން ތައްޔާރުކޮށް ހުށަހެޅި ހާދިސާ ހިނގި ގޮތުގެ ރިޕޯޓުގަ އެވެ.

ނުރައްކާތެރި އެކްސިޑެންޓުގެ ސީސީޓީވީ ފުޓޭޖު ވީޑިއޯއިން ފެންނަ ގޮތުން ކާރު ބާރު ސްޕީޑުގައި ކޮންޓްރޯލުނުވެ ގޮސް ޖެހިފައިވަނީ އެ މަގުގެ އެއްފަރާތުގައި ސައިކަލްގައި މަޑުކޮށްލައިގެން އިން މީހެއްގެ ގައިގަ އެވެ. ކާރުން ޖެހުމާއެކު އޭނާ އާއި ސައިކަލް އަދި މަގުގެ އެއްފަރާތުގައި ހުރި ގަސްވެސް ބިންދައިގެން ގޮސް ވިއްސައިގެން ދާ މަންޒަރު ފެނެ އެވެ.

މި މައްސަލައާ ގުޅިގެން އެކްސިޑެންޓު ހިނގާދިޔަގޮތުގެ ރިޕޯޓުގައި ފުލުހުން ބުނީ، އަނިޔާވި މީހާ ވިއްސައިގެން ގޮސް ފުރަތަމަ ޖެހުނީ ކަނދުރާކަމަށާއި އޭގެ ސަބަބުން އޭނާގެ ކަނދުރާ އާއި މައިބަދައިގައި ރެނދުލާފައިވާ ކަމަށެވެ.

މައްސަލައިގައި ތުހުމަތު ކުރެވޭ، އިބްރާހިމް އިކްރާމަށް ވެސް އެކްސިޑެންޓުގައި އަނިޔާވެފައިވާ ކަމަށް ފުލުހުން ބުނެފައިވެ އެވެ. އެގޮތުން އޭނާގެ މެޔަށް ތަދުވެފައި ވާކަމަށް ފުލުހުންގެ ރިޕޯޓުގައިވެ އެވެ. އިކްރާމް އެކްސިޑެންޓު ހިނގި ސަރަހައްދު ދޫކޮށް ދިޔައީ މެއަށް ތަދުވުމުން ކަމަށްވެސް ފުލުހުން ތައްޔާރުކުރި ރިޕޯޓުގައި ބުނެފައިވެ އެވެ.

މައްސަލާގައި ހައްޔަރުކުރި މީހުން ވަނީ އެ މީހުންގެ ބަންދަށް ލުއި ދިނުމަށް ކޯޓުގައި އެދިފަ އެވެ. ނަމަވެސް ކޯޓުން ވަނީ ކާރު ދުއްވަން އިން އިކްރާމުއްރަހްމާން އާއި އިބްރާހިމް އިކްރާމް ޝަރީއަތް ނިމެންދެން ބަންދުކޮށްފަ އެވެ. މީގެ އިތުރުން ކާރުގައި އިން ނާޖިހު އިސްމާއިލްގެ ބަންދަށް 15 ދުވަސް ވަނީ ޖަހާފަ އެވެ.