ޕަބްލިކް ސާވިސް މީޑިއާ (ޕީއެސްއެމް)ގެ ތިން ބުރީގެ އާ އިމާރާތެއް އަޅަން ނިންމައި އެ އިމާރާތަށް ބޭނުންވާ ކުރެހުމާއި ބިއޯކިއު ތައްޔާރުކުރާނެ ބަޔަކު ހޯދަން އިއުލާންކޮށްފި އެވެ.

ޕީއެސްއެމްއިން ކޮށްފައިވާ އިއުލާނެއްގައި ބުނެފައިވަނީ މިކަމަށް ޝައުގުވެރިވާ ފަރަތްތަކުން މި މަހުގެ 23 ވަނަ ދުވަހުގެ ހެނދުނު 10:00 އަށް ޓީވީއެމް ބިލްޑިން އަށް ހާޒިރުވެ މައުލޫމާތު ސާފުކުރުމަށް ފަހު މި މަހުގެ 30 ވަނަ ދުވަހުގެ 10:00 އަށް ޕްރޮޕޯސަލް ހުށަހަޅަން ޖެހޭ ކަމަށެވެ.

ޕީއެސްއެމުން ބުނީ 23 ވަނަ ދުވަހު ބާއްވާ މައުލޫމާތު ދިނުމުގެ ބައްދަލުވުމަށް ހާޒިރުނުވާ ފަރާތްތަކުގެ ޕްރޮޕޯސަލް ބަލައި ނުގަންނާނެ ކަމަށެވެ.

ޕީއެސްއެމަށް ތިން ބުރީގެ އާ އިމާރާތެއް އަޅަން މި ނިންމި ސަރުކާރުގެ ހަރަދުތައް ކުޑަކުރަމުން ފިޔަވަޅުތަކެއް އަޅަމުން އަންނަ ދަނޑިވަޅެއްގަ އެވެ.

ރާއްޖޭގެ މާލީ ހާލަތު ގޯސްވެ، ހަރަދު ކުޑަކުރަން އަޅާ ފިޔަވަޅުތަކުގެ ތެރެއިން ސަރުކާރުގެ ސިޔާސީ މުވައްޒަފުންގެ އަދަދު މަދުކޮށް، އިތުރު ފިޔަވަޅުތައް އަޅަން ނިންމާފައިވާކަމަށް ރައީސް މުއިއްޒު ވިދާޅުވީ ޖޫން 27، ގަ އެވެ. އެހެންނަމަވެސް އޭގެ ފަހުންވެސް ސަރުކާރުން ވަނީ ސިޔާސީ މަގާމުތަކަށް ބޭފުޅުން އައްޔަން ކުރައްވާފަ އެވެ.