ފަރަންސޭސިވިލާތުގެ ޕެރިހުގައި މި އަހަރުގެ ޖުލައި 26 އިން އޮގަސްޓް 11 އަށް އޮންނަ ބައިނަލްއަގުވާމީ އޮލިމްޕިކްސްގައި ވާދަކުރުމުގެ ފަހުރު ހޯދި ދިވެހި އެތުލީޓް ފާތިމަތު ދީމާ އަލީގެ މި ތާރީހީ ކާމިޔާބީއަށް މަރްހަބާ ވިދާޅުވެ، ފާތިމަތު ދީމާ އަލީގެ އާއިލާ އަށް، ރައީސް މުހައްމަދު މުއިއްޒު ހިތްވަރުދެއްވައިފި އެވެ.

ދީމާގެ އާއިލާއާ ފޯނުން ގުޅުއްވައި ރައީސް ދެއްކެވި ވާހަކަފުޅުގައި، މިއީ އޮލިމްޕިކް ކޮލިފައިންގެ ފައިނަލް މެޗެއް ކާމިޔާބުކޮށްގެން އޮލިމްޕިކްސްގައި ވާދަކުރުމުގެ ޝަރަފްވެރި ޖާގައެއް ދިވެހި ކުޅިވަރު ކުޅުންތެރިއަކު ހާސިލްކުރި ފުރަތަމަ ފަހަރުކަން ފާހަގަކުރައްވައި އެކަމަށްޓަކައި ވަރަށް އުފާކުރައްވާކަމުގައި ވިދާޅުވި އެވެ. އަދި ދެކުނު އޭޝިއާ ސަރަހައްދުގެ އެންމެ މޮޅު ޓޭބަލް ޓެނިސް ކުޅުންތެރީންނާ ވާދަކޮށް ދިވެހިރާއްޖޭގެ ޒުވާން އަންހެން އެތުލީޓަކު މި ހޯދި ބޮޑު ކާމިޔާބީއަށް މުޅި ރާއްޖެ ފަހުރުވެރިވާކަން ފާހަގަކުރެއްވި އެވެ.

ކުޅިވަރުގެ ރޮނގުގައި ވަރަށް ޅަ އުމުރުގައި ދީމާ ހޯދަމުންދާ ހަލުވި ކާމިޔާބީތަކާ ކުޅިވަރުގެ ހުނަރު އިތުރަށް އުނގެނި ކުރިއެރުމަށް ކުރަމުންދާ ހިތްވަރު ރައީސް މުއިއްޒު ފާހަގަކުރެއްވީ ނަމޫނާއެއްގެ ގޮތުގަ އެވެ. އަދި މިގޮތުގައި ވަރުގަދަ އަޒުމަކާ އެކު ހުއްޓުމެއް ނެތި ކުރިއަށްދިއުމަށް އެމަނިކުފާނު އެދިވަޑައިގަތެވެ.

އޮލިމްޕިކްސްގައި ވާދަކޮށް ރަނގަޅު ކާމިޔާބީއަކާ ހަމަޔަށް ދިއުމަށް ދީމާ އަށް މި ލިބުނު ފުރުސަތުގައި ދިވެހި ސަރުކާރުން ދެއްވެން އޮތް ހުރިހާ އެހީތެރިކަމަކާއި އެއްބާރުލުމެއް ދެއްވާނެކަމުގެ ޔަޤީންކަން ވެސް ރައީސް ވަނީ ދެއްވައިފަ އެވެ. އަދި މިއީ ބައިނަލްއަގުވާމީ ކުޅިވަރުގެ މައިދާނުގައި މުޅި ދިވެހި ރާއްޖެއަށް ލިބުނު ވަރަށް ބޮޑު އުފަލަކާ ކުރިއެރުމެއް ކަމަށް ވެސް ރައީސް ވިދާޅުވި އެވެ.

ދެކުނު އޭޝިއާ ސަރަހައްދުގެ އޮލިމްޕިކް ކޮލިފައިން ޓޭބަލް ޓެނިސް ފައިނަލް މެޗު ކާމިޔާބުކޮށް ދީމާ މި ހޯދި ޝަރަފާއެކު، ރާއްޖޭގެ ތާރީހުގައި އޮލިމްޕިކް ކޮލިފައިން ފައިނަލެއް ކާމިޔާބުކޮށް އޮލިމްޕިކްސްގެ ޖާގައެއް ކަށަވަރުކުރި ފުރަތަމަ އެތުލީޓަށް، އަދި އޮލިމްޕިކްސްގައި ޓޭބަލް ޓެނިސް ކުޅުމުގެ ފުރުސަތު ލިބޭ ފުރަތަމަ ދިވެހި ކުޅުންތެރިޔާއަށް ވެސް ދީމާ ވާނެ އެވެ.