ދިވެހި ކުންފުންޏެއް ކަމުގައިވާ "މޮޑާން ހެލްތުކެއާ ޕްރައިވެޓް ލިމިޓެޑް" އިން މާލޭގައި ހުޅުވާ "ޑެންޓަ މާޓް" ފިހާރަ ހުޅުވުމާ ގުޅުވައިގެން ރާއްޖޭގައި މުޅިން އަލަށް އިންޓަނޭޝަނަލް މެޑިކަލް ކޮންކްލޭވްއެއް "މެޑި ޑެންޓް" ނަމުގައި ބާއްވައިފި އެވެ.

މާގިރި ހޮޓެލްގައި ބޭއްވި މި ކޮންކްލޭވްގައި ތަފާތު ތިން މައުޟޫއަކަށް ސިއްހީ ދާއިރާގެ ކަމާބެހޭ މާހިރުންގެ ފަރާތުން މައުލޫމާތު ދެއްވުމާއެކު ތަފާތު ދިހަ ފަރާތަކުން ސިއްހީ ފަރުވާގައި ބޭނުންކުރާ ޒަމާނީ އާލަތްތަކާއި ތަކެތި ރާއްޖެއަށް ތާރަފްކޮށްފައިވެ އެވެ. މީގެ ތެރޭގައި ދަތުގެ ފަރުވާދިނުމަށް ބޭނުންވާ ތަފާތު ސާމާނާއި، ސާޖިކަލް އަދި އެހެނިހެން ސާމާނު ހިމެނެ އެވެ.

ކުންފުނީގެ ފަރާތުން މައުލޫމާތު ދެއްވަމުން ކުންފުނީގެ ބިޒްނަސް ޑިވެލޮޕްމަންޓް ޑިރެކްޓަރު ޝަމީރު ޖަލާލުއްދީން ވިދާޅުވީ ގޮތުގައި އެކުންފުނިން އަމާޒު ހިފާފައިވަނީ އިތުބާރުކުރެވޭ ޒަމާނީ ސިއްހީ ވަސީލަތްތަކާއި ހިދުމަތްތައް ދިވެހިން އަތްފޯރާފަށުގައި ފޯރުކޮށް ދިނުމަށެވެ.

ރާއްޖޭގައި މުޅިން އަލަށް ބޭއްވިގެން ދިޔަ އިންޓަނޭޝަނަލް މެޑިކަލް ކޮންކްލޭވް

"އަޅުގަނޑުމެން ގަބޫލުކުރަނީ އެންމެ ރަނގަޅު ފަރުވާދެވޭނީ ޒަމާނީ ވަސީލަތްތަކާއި އާލާތްތައް ބޭނުންކޮށްގެން ކަމަށް. އަދި އެވަސީލަތްތައް ބޭނުންކުރަން މި ދާއިރާގައި މަސައްކަތްކުރާ ފަރާތްތަކަށް އެކަށޭނަ މައުލޫމާތު ލިބިދިނުމަކީ އެހާމެ މުހިއްމު ކަމެއް." މި ކޮންކްލޭވްގެ މަގްސަދު ސާފުކޮށްދެއްވަމުން އޭނާ ވިދާޅުވިއެވެ.

ދަތުގެ ފަރުވާ ދިނުމަށް ބޭނުންވާ ތަފާތު ސާމާނު ވިއްކުމަށް ހާއްސަ ފިހާރައެއް މާލޭގެ ސަބްދެލި މަގުގައި "ޑެންޓަ މާޓް" ނަމުގައި އެކުންފުނިން ހުޅުވާއިރު މުސްތަގްބަލުގައި މިފަދަ އެތައްކަމެއް ކުންފުނިން ތައާރަފްކުރުމަށް ރޭވިފައިވާކަމަށާއި، އުއްމީދަކީ މި ދާއިރާއަށް އިންގިލާބީ ހެޔޮބަދަލެއް ގެނެސްދިނުން ކަމުގައި ވެސް އޭނާ ވިދާޅުވި އެވެ.

ރާއްޖޭގައި މުޅިން އަލަށް ބޭއްވިގެން ދިޔަ އިންޓަނޭޝަނަލް މެޑިކަލް ކޮންކްލޭވްގެ ތެރެއިން..

މިއަދު މާލޭގައި ހުޅުވުނު "ޑެންޓަ މާޓް" އިން ދަތުގެ ފަރުވާދިނުމަށް ބޭނުންވާ ތަފާތު ސާމާނާއި، ސާޖިކަލް އަދި އެހެނިހެން ސާމާނު އަގުހެޔޮކޮށް ލިބެން ހުންނާނެ ކަމަށް ކުންފުނިން މައުލޫމާތު ދެއްވި އެވެ. މި ކޮންކްލޭވްގައި ރާއްޖޭގައި ހިދުމަތްކުރާ ޑެންޓިސްޓުން، އޯތޮޑޮންޓިސްޓުން، ޑޮކްޓަރުންނާއި ސާޖަނުންގެ ތެރެއިން ގިނަ އަދަދެއްގެ ބަޔަކު ބައިވެރިވެވަޑައިގަތެވެ.