"ފިކުރެއްގެ ދިރުން" މިނަމުގައި ރައީސް މުހައްމަދު ނަޝީދު އިސްވެ ހުންނަވާ ކުރިއަށްގެންދަވާ ހަރަކާތަށް ތާއީދު ކުރައްވާ ރައްޔިތުންގެ މަޖިލީހުގެ މެމްބަރުން މިރޭ ވަކިން ބައްދަލުވުމެއް ބާއްވައިފި އެވެ.

މި ބައްދަލުވުމުގެ ރިޔާސަތުގައި އިންނެވީ ރައީސް ނަޝީދެވެ. ރައީސް ނަޝީދުގެ އިތުރުން މަޖިލީހުގެ ނައިބު ރައީސް އީވާ އަބްދުﷲ އާއެކު ޖުމްލަ 12 މެމްބަރުން ބައިވެރިވި އެވެ.

ބޮޑުފެންވަޅުގޭގައި ބޭއްވި މި ބައްދަލުވުމުގެ އެޖެންޑާގައި ހިމެނޭ ކަންކަމުގެ ތެރޭގައި މަޖިލިހަށް ހުށަހަޅާފައިވާ "ފިކުރެއްގެ ދިރުމުގެ" ގަރާރުތަކާ ބެހޭ ގޮތުން މަޝްވަރާކުރުން ހިމެނެ އެވެ. އަދި "އެހެނިހެން" ނަމުގައި އައިޓަމެއް ހިމަނާފައިވެ އެވެ.

މި ބައްދަލުވުމާގުޅޭ ގޮތުން ފިކުރެއްގެ ދިރުމުގެ ފަރާތުން އަދި އިތުރު ތަފްސީލް ހާމައެއްނުކުރެ އެވެ.

އެމްޑީޕީގެ ރިޔާސީ ޕްރައިމަރީއަށްފަހު އުފެދުނު ހިޔާލު ތަފާތުވުން ތަކުގައި ރައީސް ނަޝީދުވަނީ ފިކުރެއްގެ ދިރުމުގެ ނަމުގައި ވަކި ސިޔާސީ ހަރަކާތެއް ފަށާފަ އެވެ. އަދި ރައީސް އިބްރާހިމް މުހައްމަދު ސޯލިހަށް ފާޅުގައި ގެންދަވަނީ ފާޑު ވިދާޅުވަމުންނެވެ.