އަމިއްލަ ދެ ކުންފުންޏެއްގެ އިޖުތިމާއީ ޒިންމާގެ ދަށުން ހުޅުމާލޭ ދެވަނަ ފިޔަވަހީގައި މިސްކިތް ބިނާކުރުމަށް ބިން ހަވާލުކޮށްފި އެވެ.

ކުންފުނީގެ އިޖުތިމާއީ ޒިންމާގެ ދަށުން ހުލުމާލޭ ދެވަނަ ފިޔަވަހީގައި މިސްކިތް ތަރައްގީކުރާ ދެ ކުންފުންޏަކީ ސަން ފްރަންޓާއި، ވެލިގާ ހާޑްވެއާ އެވެ.

ސަން ފްރަންޓުން ހުޅުމާލެ ދެވަނަ ފިޔަވަހީގައި ބިނާކުރާ މިސްކިތަކީ ޒަމާނީ އަދި އިސްލާމީ ތަރިކަ ރަމްޒުކޮށްދޭހެން ފަރުމާކޮށްފައިވާ މިސްކިތެކެވެ.

އެ މިސްކިތް ބިނާކުރުމަށް ބޭނުންވާ ބިން ހަވާލުކުރުމުގެ އެއްބަސްވުމުގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަހުމަދު އާތިފެވެ. ސަން ފްރަންޓްގެ ފަރާތުން ސޮއިކުރެއްވީ އެކުންފުނީގެ މެނޭޖިން ޑިރެކްޓަރު މުހައްމަދު ރަޝާދު އާދަމެވެ.

މިސްކިތް ބިނާކުރުމަށް 22،900 އަކަފޫޓޫގެ ބިމެއް ހުޅުމާލޭ ދެވަނަ ފިޔަވަހިން ވަނީ ކަޑައަޅާފަ އެވެ. މިއީ 2،000 މީހުންގެ ޖާގައިގެ މިސްކިތެކެވެ.

މި މިސްކިތަކީ އިސްލާމިކް ސެންޓަރެއްގެ ކޮންސެޕްޓަށް، މިސްކިތުގެ ބޭރުގައި އީދު ފަދަ މުނާސަބަތުގައި ސަލާން ގަލާންކުރުން ފަދަ ހަރަކާތްތައް ކުރިއަށްގެންދިއުމަށް ރައްޔިތުންނަށް ޖާގަ ލިބޭނެ ޒަމާނީ މިސްކިތެކެވެ. މީގެ އިތުރުން މި މިސްކިތުގައި އަންހެނުންނަށް އެކަހެރިކޮށް ވުޟޫކޮށް ނަމާދު ކުރެވޭނެ އެވެ. އަދި ކަރަންޓު ދިނުމަށް އިރުގެ ހަކަތަ، މި މިސްކިތުގައި ބޭނުންކުރެވޭނެ އެވެ.

އިޖްތިމާއީ ޒިންމާގެ ދަށުން ހުޅުމާލޭ ދެވަނަ ފިޔަވަހީގައި ދެން މިސްކިތް ބިނާކުރާ ކުފުންޏަކީ ވެލިގާ ހާޑްވެއާ އެވެ.

މި މިސްކިތް ބިނާކުރުމަށް ބޭނުންވާ ބިން ހަވާލުކުރުމުގެ އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަހުމަދު އާތިފެވެ. އަދި ވެލިގާގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުހައްމަދު އަބޫބަކުރު އެވެ.

ޒަމާނީ ރީތި ފަރުމާއަކަށް ބިނާކުރާ މި މިސްކިތް އެޅުމަށް 15،400 އަކަފޫޓުގެ ބިމެއް ހުޅުމާލޭ ދެވަނަ ފިޔަވަހިން ވަނީ ކަނޑައަޅާފަ އެވެ. މިއީ މިސްކިތުގެ އެތެރެއާ ބޭރު ހިމެނޭހެން 2،200 މީހުންނަށް އެއްފަހަރާ ނަމާދު ކުރެވޭނެ ޖާގައިގެ މިސްކިތެކެވެ. މިސްކިތުގައި އަންހެނުން ނަމާދުކުރުމަށް ޚާއްސަ ބައެއް ވެސް ހުންނާނެ އެވެ.

އެޗްޑީސީގެ މެނޭޖިން ޑިރެކްޓަރު އާތިފް ވަނީ ހުޅުމާލޭގައި މިސްކިތް ބިނާކުރުމަށް ކުންފުނިތަކުން ބަހައްޓާ ޝައުގުވެރިކަން ފާހަގަކޮށް އެކަމަށް ޝުކުރު އަދާކުރައްވާފަ އެވެ.

"ޕްރައިވެޓް ސެކްޓަރއިން ހިލޭ ކުންފުނީގެ ސީއެސްއާރްގެ ދަށުން ހުޅުމާލޭގައި އެކި މަސައްކަތްތައް ކުރުމަށް ބޮޑު ތަރުހީބެއް ލިބޭ. ދީނީ ކަންކަން ކުރިއެރުވުމަށް ދޭ ސަމާލްކަން ބޮޑު،" އާތިފް ފާހަގަކުރެއްވި އެވެ.

ހުލުމާލޭ ދެވަނަ ފިޔަވަހީގައި މީގެ ކުރިން ވެސް އަމިއްލަ ކުންފުންޏާކުން ވަނީ މިސްކިތެއް ބިނާކޮށްފަ އެވެ. އަދި ސަރުކާރުން އިތުރު ދެ މިސްކިތް ތަރައްގީކުރުން ވެސް، މިހާރު ކުރިއަށްދެ އެވެ.

ހުޅުމާލެ ދެވަނަ ފިޔަވަހީގައި މިވަގުތު ބޭނުންކުރަމުންދަނީ މީހުން އާބާދުވި ސަރަޙައްދުތަކުގައި ހަދާފައިވާ ވަގުތީ މިސްކިތްތަކެކެވެ.