ހުޅުމާލޭގެ ފުރަތަމަ ފިޔަވަހީގައި ގާއިމްކުރާ ވޯޓާ ތީމް ޕާކެއް ހެދުމަށް ވޯޓާ ފްރޮންޓް ހޮޓެލް އެންޑް ލެޝާއާއެކު ހެދި އެއްބަސްވުން އުވާލައި ބިން ހަވާލު ކުރުމަށް އެޗްޑީސީން ފޮނުވި ސިޓީއަށް އަމަލުކުރުން ފަސްކުރުމަށް ހައިކޯޓުން ހުކުމްކޮށްފި އެވެ.

ހުޅުމާލޭގައި ވޯޓާ ތީމް ޕާކެއް ތަރައްގީކުރުމަށް ވޯޓާ ފްރަންޓް ކުންފުންޏާ ހަވާލުކުރީ 2017 ވަނަ އަހަރު އެވެ.މި މަޝްރޫޢުގެ މަސައްކަތް ކުރިއަށް ނުގޮސް ހުއްޓިފައިވާ ކަމުގެ ކަންބޮޑުވުން އެޗްޑީސީން ވަނީ ފާޅުކޮށްފަ އެވެ.

އެޗްޑީސީން ވަނީ އެ ތީމް ޕާކުގެ މަސައްކަތް ހުއްޓިފައިވާތާ އަހަރުތަކެއް ފަހުން، ޕްރޮޖެކްޓު ނިމޭނެކަމުގެ އެއްވެސް އަލިމަގެއް ނުފެނިގެން އެއްބަސްވުން ބާތިލްކޮށްފަ އެވެ.

ވޯޓާ ތީމް ޕާކްގެ އެއްބަސްވުން އުވާލިއިރު، އެ އެއްބަސްވުމާ މެދު ދެ ކުންފުނީގެ ދެމެދުގައި ވަރަށް ބޮޑު އަރާރުމެއް އުފެދި މައްސަލަ ކޯޓަށް ވެސް ހުށަހެޅި އެވެ.

ސިވިލް ކޯޓަށް ހުށަހެޅި މިމައްސަލަ ކުރިއަށް ދަނިކޮށް އެޗްޑީސީން ވަނީ މިދިޔަ މަހުގެ 22 ވަނަ ދުވަހު އެއްބަސްވުން ބާތިލްކޮށް ބިން 30 ދުވަހުގެ ތެރޭގައި އަނބުރާ އެޗްޑީސީއާ ހަވާލުކުރުމަށް އަންގާފަ އެވެ.

މިކަމާ ގުޅިގެން ވޯޓާ ފްރަންޓް ކުންފުނިން ވަނީ އެޗްޑީސީގެ އެންގުމަށް އަމަލުކުރުން ފަސްކޮށްދިނުމަށް ވަގުތީ އަމުރަކަށް އެދި ސިވިލް ކޯޓަށް ހުށަހާޅަފަ އެވެ. ސިވިލް ކޯޓުން ނިންމީ އެފަދަ އަމުރެއް ނެރެނުދެވޭނެ ކަމަށެވެ. އަދި ސިވިލް ކޯޓުގެ މި ނިންމުން، ވޯޓާ ފްރޮންޓް ހޮޓެލް އެންޑް ލެޝާ ޕްރައިވެޓް ލިމިޓެޑުން ހައި ކޯޓުގައި އިސްތިއުނާފުކުރި އެވެ.

ހައިކޯޓުން އިއްޔެ ނެރުނު އަމުރުގައި ވަނީ އެ މައްސަލަ ހައިކޯޓުން ބަލައި ނިމެންދެން އެޗްޑީސީގެ ސިޓީއަށް އަމަލުކުރަން ފަސްކުރުމަށް އެޗްޑީސީގެ މައްޗަށް އަމުރުކޮށްފަ އެވެ.