2023 ވަނަ އަހަރުގެ ރިޔާސީ އިންތިހާބަށް ތައްޔާރުވުމުގެ ގޮތުން ޖުމްހޫރީ ޕާޓީން އެ ޕާޓީގެ ކޮންގްރެސް އަންނަ ޑިސެމްބަރު މަހު ބާއްވާ ގޮތަށް ނިންމައިފި އެވެ.

ޖުމްހޫރީ ޕާޓީގެ ތަރުޖަމާން އަލީ ސޯލިހު ވިދާޅުވީ ޖުމްހޫރީ ޕާޓީގެ ގައުމީ ޖަލްސާ ނުވަތަ ގައުމީ ކޮންފަރެންސް 2022 ޑިސެމްބަރުގައި ބޭއްވުމަށް ވާންޖޭހޭ މުހިއްމު ތައްޔާރީތައް ޖޭޕީގެ ސެކްރެޓޭރިއޭޓުން ވަމުންދާކަމަށެވެ. މި ކޮންފަރެންސަކީ ސިޔާސީގޮތުން ޖޭޕީއިން ނިންމާ މުހިއްމު ނިންމުންތަކަށް ކޮށާލެވޭ މަގަކަށް ވާނެކަމަށް އޭނާ ވިދާޅުވި އެވެ.

ކޮންގްރެސްއަށް ތައްޔާރުވުމުގެ ގޮތުން ޕާޓީގެ ރަށު ގޮފިތައް އަސާސީ ގަވާއިދާ އެއްގޮތަށް އެކުލަވާލައި, ފުރިހަމަކުރުމަށްޓަކައި މަސައްކަތް ކުރަމުންދާ ކަމަށްވެސް ޖުމްހޫރީ ޕާޓީން ހާމަ ކުރެ އެވެ.

ކޮންގްރެސްގައި ޖޭޕީގެ ކައުންސިލު އަލުން އިންތިޚާބު ކުރުމަށްވެސް ވަނީ ހަމަޖެހިފަ އެވެ. އަދި ރިޔާސީ އިންތިހާބުގައި ކުރިއަށްދާނީ އެ ޕާޓީން ނެރޭ ވަކި ކެންޑިޑޭޓެއްތޯ ނުވަތަ ކޯލިޝަނެއްގެ ތެރެއިންތޯ ވެސް ނިންމުމަށްވަނީ ހަމަޖެހިފަ އެވެ.

ޖުމްހޫރީ ޕާޓީއަކީ ސަރުކާރު ކޯލިޝަންގައި ހިމެނޭ ޕާޓީއެކެވެ. އެޕާޓީއަށް ސަރުކާރުގެ ގިނަ މަގާމްތަކެއް ލިބިފައިވެ އެވެ.