ހުޅުމާލޭ ދެވަނަ ފިޔަވަހީގައި އާންމުންނަށް ނުވަދެވޭ ގޮތަށް ބަންދުކޮށްފައި އޮންނަ ސަރަހައްދުގައި މިއަދު އިރުއޮއްސުނު އިރު ލޮރީއަކާއި ކާރެއް ޖެހި، ތިން މީހަކަށް އަނިޔާވެއްޖެ އެވެ.

މަންޒަރު ދުށް މީހުން ބުނި ގޮތުގައި ހުޅުމާލޭ ފޭސް 2ގެ އަނައުނާ މަގު ހަތަރު އަނގޮޅި ކަންމަތީގައި ހިނގި އެ އެކްސިޑެންޓްގައި ތިން މީހަކަށް ސީރިއަސް އަނިޔާތަކެއް ލިބުނު ކަމަށެވެ.

ފުލުހުން ބުނީ އެ ހާދިސާގެ މައުލޫމާތު 6:50ގައި ލިބިފައިވާ ކަމަށެވެ. އަދި އަނިޔާވި ތިން މީހަކު ހޮސްޕިޓަލަށް ގެންދިޔަ ކަމަށް ވެސް ފުލުުހުން ބުންޏެވެ.

ހުޅުމާލޭގެ ދެވަނަ ފިޔަވަހީގައި މިރޭ ހިނގި ނުރައްކާތެރި އެކްސިޑެންޓްގައި ކާރު ހަލާކުވެފައި.

އެ ހާދިސާގައި އަނިޔާވި އެކަކުގެ އާއިލާގެ މީހަކު "ހުރިހާ"އަށް ބުނީ އެ އެކްސިޑެންޓް ހިނގިއިރު، އެ މީހުން ތިބީ ކާރު މަޑުކޮށްގެން ޑްރޯންއެއް އަރުވަން ކަމަށެވެ.

"އެ މީހުން އެތަނަށް ދިޔައީ އިރުއޮއްސޭ މަންޒަރުގެ ވީޑިއޯއެއް ޑްރޯންއަކުން ނަގަން. ކާރު ތެރޭގައި ތިއްބާ ކުއްލިއަކަށް އައި ޑަމްޕް ލޮރީން ޖެހި އެ މީހުންނާއެކު ކާރު ވެސް ފުނޑުފުނޑުވީ،" އޭނާ ބުންޏެވެ.

އޭނާ ބުނީ އޭގެ ތެރެއިން އެކަކުގެ އަތް ވެސް ބިނދި އިތުރު ބޮޑެތި އަނިޔާތަކެއް ލިބުނު ކަމަށެވެ. އަދި އެ މީހުންނަށް ހުޅުމާލޭ ހޮސްޕިޓަލުގައި ފަރުވާދެމުން އަންނަ ކަމަށް ވެސް އެ މީހާ ބުންޏެވެ.

ހުޅުމާލޭގެ ދެވަނަ ފިޔަވަހީގައި މިރޭ ހިނގި ނުރައްކާތެރި އެކްސިޑެންޓްގައި ކާރު ހަލާކުވެފައި.

އެ އެކްސިޑެންޓް ހިނގިއިރު އެ ލޮރީ ދިޔައީ ގިނަ އަދަދެއްގެ ވެލި ބަރުކޮށްގެންނެވެ. އަދި ލޮރީގެ ކުރިމަތީގައި ކާރު ގޮސް ޖެހުނީ ދުއްވާ މީހާ އިންނަ ފަޅީގެ ދޮރާ ދިމާލުންނެވެ. ކާރުގެ އެއާ ބޭގް ވެސް ވަނީ ނުކުމެެފަ އެވެ.

"އެ މީހުން ސަލާމަތްވީ ކާރުގެ އެއާ ބޭގު ހުރީމަ. ކާރުގައި ޖެހުނު ފަޅި އޮތީ ވަރަށް ބޮޑަށް ބަނޑިވެ، ހަލާކުވެފައި،" އޭނާ ބުންޏެވެ.

ހުޅުމާލޭގެ ދެވަނަ ފިޔަވަހީގައި މިރޭ ހިނގި ނުރައްކާތެރި އެކްސިޑެންޓްގައި ކާރު ހަލާކުވެފައި.

އާއްމުންނަށް ނުދެވޭ ގޮތަށް ބަންދުކޮށްފައިވާ އެ ސަރަހައްދަށް ގިނަ އަދަދެއްގެ މީހުން މަސް ބޭނުމަށާއި އެކި ދުއްވާލަން ވަދެ އުޅެ އެވެ.