އެމްޑީޕީގެ ވާދަވެރި ޗެއާޕާސަންގެ އިންތިހާބު އިކޮނޮމިކް މިނިސްޓަރު ފައްޔާޒް އިސްމާއިލް ކާމިޔާބުކުރެއްވިތާ އެތައް ގަޑިއިރެއް ފަހުން ރައީސް މުހައްމަދު ނަޝީދު ވެސް މަރުހަބާ ވިދާޅުވެއްޖެ އެވެ.

ފައްޔާޒަށް މަރުހަބާ ވިދާޅުވެ ރައީސް ނަޝީދު މިއަދު ހަވީރު ކުރެއްވި ޓުވީޓެއްގައި ވިދާޅުވީ "ފަޔާއަށާއި ފަޔާގެ ކެމްޕޭން ޓީމަށް އަދި އިންތިއަށާއި އިންތިގެ ޓީމަށް ވަރަށް ބޮޑަށް މަރުހަބާ. ފަޔާގެ ޗެއާޕާސަން ކަމުގައި އެމްޑީޕީއަށް އިތުރު ކާމިޔާބީތައް ހޯދައިދޭނެ ކަމީ އަޅުގަނޑު ހިތުގައި ޝައްކު ހިނގާ ކަމެއް ނޫން،" ކަމަށެވެ.

އެ ޓުވީޓަށް ޝުކުރު އަދާކުރައްވައި ފައްޔާޒު ކުރެއްވި ޓުވީޓުގައި ވިދާޅުވީ "އަޅުގަނޑުމެންގެ ގައުމަށް ޑިމޮކްރަސީއާއި ތަރައްގީ ގެނައުމުގައި ކުރިޔަށްދާނީ ތިޔަބޭފުޅާގެ އިރުޝާދާއި އެހީތެރިކަމާއެކު. ކޭކޭބީކޭ،" ފައްޔާޒު ވިދާޅުވި އެވެ.

ވަގުތީ ނަތީޖާއިން ދައްކަނީ ވޯޓުގެ 58 ޕަސެންޓް ފައްޔާޒަށް ލިބިފައިވާ ކަމަށެވެ. އަދި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) އަށް ލިބިވަޑައިގަތީ 42 ޕަސެންޓެވެ.

ވަގުތީ ނަތީޖާ ދައްކާގޮތުން މި އިންތިހާބުގައި 49،370 މެމްބަރުން ވަނީ ވޯޓުލާފަ އެވެ. އޭގެ ތެރެއިން 28،514 މީހުން ވޯޓުލާފައިވަނީ ޗެއާޕާސަން ކަމަށް ފައްޔާޒު އިސްމާއީލް އިންތިޚާބު ކުރުމަށެވެ. އެއީ ވޯޓުލީ މީހުންގެ 58 ޕަސެންޓެވެ. އިންތިއަށް ވޯޓުލާފައިވަނީ 20،856 މީހުންނެވެ. އެއީ ވޯޓުލީ މީހުންގެ 42 ޕަސެންޓެވެ.