ހުޅުމާލޭގެ ރެސްޓޯރެންޓެއްގެ ތެރޭގައި ވަޅިން ހަމަލާ ދީ ބަންގްލަދޭޝްގެ މީހަކު މަރާލި ކަމަށް ތުހުމަތުކުރެވޭ ޕާކިސްތާނުގެ މުހައްމަދު އާބިދު 26، ހޯދަން އޭނާގެ ފޮޓޯ ފުލުހުން އާންމުކޮށްފި އެވެ.

ފުލުހުން މިރޭ ކުރި ޓްވީޓެއްގައި ބުނީ އޭނާ ފެނިއްޖެނަމަ އޭނައާ ކުރިމަތިލުމުގެ ބަދަލުގައި ފުލުހުންގެ ހިލޭ ގުޅޭ ނަންބަރު 119އަށް ގުޅައި އެ މައުލޫމާތު ހިއްސާކޮށްދިނުމަށް އެދޭ ކަމަށެވެ.

އޭނާ އަކީ ވަރަށް ނުރައްކާތެރި މީހެއް ކަމަށް ވެސް ފުލުހުން ބުންޏެވެ.

ހުޅުމާލޭ ނިރޮޅުމަގު 19 ގޯޅީގައި ހުންނަ ހާންޖީ ރެސްޓޯރަންޓުގައި އެ ހާދިސާ ހިނގީ މިއަދު ހަވީރު 5:00 ހާއިރުއެވެ.

އެ ސަރަހައްދުގައި ހުރި މީހަކު ބުނީ ބިދޭސީ މީހާގެ ހަށިގަނޑުގެ އެކި ތަންތަނަށް ހަމަލާދީފައިވާ ކަމަށެވެ. އެގޮތުން އެ މީހާގެ ކަރަށާއި ބޮލަށާއި އުނަގަނޑަށާއި ބަނޑަށް ވަޅި ހަރާފައިވާ ކަމަށް ވެސް ބުންޏެވެ.

އެ ހަމަލާދޭ ބޭނުންކުރީ ބަދިގޭގައި ގެންގުޅޭ ވަޅިއެއް ކަމަށް ވެސް އެ މީހާ ބުންޏެވެ.

އެ ހާދިސާގައި މަރުވި މީހާއަކީ އެ ރެސްޓޯރެންޓްގައި ވެއިޓަރެއްގެ ގޮތުގައި މަސައްކަތްކުރާ މީހެކެވެ. އަދި އެ ހަމަލާދިނީ އެ ރޯސްޓަރަންޓުގައި ޕާކިސްތާނުގެ މީހެއް ކަމަށްވެ އެވެ. އޭނާ މަރާލުމުގައި އެތަނުގައި ދެން ތިބި ޕާކިސްތާންގެ އިތުރު މީހުންގެ ބައިވެރިވުން އޮތް ކަމަށް މަރާލި މީހާގެ ރަހްމަތްތެރިން ތުހުމަތު ކުރެ އެވެ.