ހުޅުމާލޭގައި ތަރައްގީކުރަމުން އަންނަ ކޮންޓެއިނާ ޕާކް ރޯދަ މަހުގެ ކުރިން ނިމޭނެ ކަމަށް ހައުސިން ޑިވޮލަޕްމަންޓް ކޯޕަރޭޝަން (އެޗްޑީސީން) އިން ބުނެފި އެވެ.

އެޗްޑީސީން ބުނީ ކޮންޓެއިނާ ޕާކް އާންމުންނަށް ހުޅުވާލުމަށް ކުރަންޖެހޭ އެންމެ ފަހުގެ މަސައްކަތް މިހާރު ކުރަމުން އަންނަ ކަމަށާއި އެ ޕާކު ރޯދަ މަސް އައުމުގެ ކުރިން ނިންމާލެވޭނެ ކަމަށެވެ.

ރާއްޖެއަށް މުޅިން އާ ކޮންސެޕްޓަކަށް ހަދާ މި ޕާކް ތަރައްގީކުރަނީ ބޭނުންނުކޮށް ދޫކޮށްލާފައި ހުންނަ ކޮންޓެއިނަރުތައް ބޭނުން ކޮށްގެންނެވެ. އަދި މި ޕާކުގައި ކެފޭ، އެގްޒިބިޝަން ސްޕޭސް އަދި ތަފާތު މަސައްކަތްތައް ކުރުމަށް ކޯ ވޯކިން ސްޕޭސްއެއް ވެސް ވަނީ ހިމަނާފަ އެވެ.

އެޗްޑީސީން ބުނީ މި ޕާކާއެކު އާއްމުކޮށް މީހުން ޒިޔާރަތްކޮށް މަސައްކަތުގެ މާހައުލުގައި އަހުލުވެރިވުމާއި ހިތްހަމަޖެއްސުމަށް ފުރުސަތު ހުޅުވިގެންދާނެ ކަމަށެވެ. އެގޮތުން މި ޕާކްގެ އެގްޒިބިޝަން ސްޕޭސްގައި ފަންނުވެރިކަމުގެ މަސައްކަތްތައް މައުރަޒުކޮށް ދައްކާލުމުގެ ފުރުސަތު ލިބިގެން ދާއިރު، ތަފާތު މަންސަތައް ފަދަ ހަރަކާތްތައް ބޭއްވުމަށް ހުޅުވާލެވިގެންދާނެ ކަމަށް ވެސް އެ ކުންފުނިން ބުންޏެވެ.

އެޗްޑީސީން ހުޅުމާލޭގައި ތަރައްގީ ކުރަމުންދާ ކޮންޓެއިނާ ޕާކް: ފޮޓޯ: އެޗްޑީސީ

މީގެ އިތުރުން ކުދި އަދި މެދު ފަންތީގެ ވިޔަފާރިތަކަށް މި ޕާކުތަކަށް އެކި ހަރަކާތްތައް ހިންގައި މަސައްކަތް ކުރުމަށް ގިނަ ފުރުސަތުތަކެއް ފަހިވެގެން ދާނެ ކަމަށެވެ.

ހުޅުމާލޭގައި ކޮންޓެއިނާ ޕާކު ތަރައްގީކުރަނީ ހުޅުމާލެ ރެޑްވޭވް މެގަ މޯލްގެ ފަހަތުގަ އެވެ.