މިއަދު ބޭއްވި އެމްޑީޕީގެ ޕާލިމެންޓްރީ ގްރޫޕުގެ އިންތިހާބުގައި ޑެޕިއުޓީ ޕީޖީ ލީޑަރުގެ މަގާމަށް އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) ހޮވިއްޖެ އެވެ.

މިއަދު އޮތް އެމްޑީޕީގެ ޕީޖީ އިންތިހާބުގައި ބިގޭގެ އިތުރުން އިތުރުން ހުޅުދޫ ދާއިރާގެ މެންބަރު އިލްޔާސް ލަބީބް އާއި ހެންވޭރު ދެކުނު ދާއިރާގެ މެންބަރު ހުސައިން ޝަހީމް ވާދަކުރެެއްވި އެވެ. ނަމަވެސް އެ ދެ ބޭފުޅުންނަށް ލިބިވަޑައިގެންނެވި ވޯޓްގެ އަދަދު އެއްވަރުވުމުން އަލުން ވޯޓް ނެގުމަށް ވަނީ ނިންމާފަ އެވެ. މި ދެބޭފުޅުންނަކީ އެންމެ ފަހުން ޕީޖީ ލީޑަރުގެ ނައިބުންގެ ގޮތުގައި ތިއްބެވި ދެބޭފުޅުންނެވެ.

އެމްޑީޕީގެ ޕާލިމެންޓްރީ ގުރޫޕްގައި ޖުމްލަ 65 މެންބަރުން ހިމެނެއެވެ. މިއިންތިހާބުގައިވެސް އެމްޑީޕީގެ ރައީސް ނަޝީދާއި، ރައީސް ސާލިހުގެ ފެކްޝަންގެ ވާދަވެރިކަން ބޮޑެވެ. ވާދަވެރިކަންބޮޑު ޕީޖީ ލީޑަރުގެ މަގާމު ރައީސް ނަޝީދުގެ ފެކްޝަންގެ އަލީ އާޒިމް ބަލިކުރައްވާ ކާމިޔާބު ކުރެއްވީ ރައީސް ސާލިހުގެ ފެކްޝަނުން ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް އެވެ. ޕީޖީގެ ނައިބުކަން ކަށަވަރު ކުރެއްބި ބިގޭ އަކީ ވެސް ރައީސް ސާލިހުގެ ފެކްޝަންގެ ބޭފުޅެކެވެ. ބިގޭ މިހާރު ހުންނެވީ ޕީޖީ ގުރޫޕްގެ ސެކްރެޓަރީ ޖެނަރަލްގެ މަގާމުގަ އެވެ.