އެމްޑީޕީގެ ޗެއާޕާސަންގެ މަގާމަށް ވާދަކުރައްވަން ނިންމެވި ކަން މިއަދު އިއުލާންކުރައްވައި އަމާޒަކީ އެމްޑީޕީ ހަރުދަނާކޮށް، ޕާޓީގެ ހެޔޮވެރިކަން ދެމެހެއްޓުން ކަމަށް އިކޮނޮމިކް މިނިސްޓަރު ފައްޔާޒް އިސްމާއިލް ވިދާޅުވެއްޖެ އެވެ.

ފައްޔާޒް ކުރެއްވި ޓުވީޓެއްގައި ވިދާޅުވީ އެ އިންތިހާބުގެ ސަބަބުން ޕާޓީ އިތުރަށް ހަރުދަނާވެގެން ދާނެ ކަމާ މެދު ޝައްކެއް ނެތް ކަމަށެވެ. އެއާއެކު، އޭނާ އެދިވަޑައިގަތީ މެމްބަރުންގެ ތާއީދަށެވެ.

ފަސް އަހަރުގެ ދައުރަކަށް އިންތިހާބުކުރާ މަގާމަށް ކުރިމަތިލުމުގެ ފުރުސަތު އިއްޔެ ވަނީ ހުޅުވާލައިފަ އެވެ. އެ ވޯޓުލުން އޮންނާނީ އަންނަ އެޕްރީލް, 16 އެވެ.

ރައީސް އިބްރާހިމް މުހައްމަދު ސޯލިހުގެ ކެބިނެޓްގައި އެންމެ ބާރުގަދަ ކަމަށް ބުނާ ވަޒީރު، ފައްޔާޒްއާ ވާދަކުރައްވާނެ ކަން އިއުލާންކުރައްވާފައިވަނީ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) އެވެ. އެސްޓީއޯގެ މެނޭޖިން ޑިރެކްޓަރު ހުސެއިން އަމްރު ވަނީ އިންތިހާބުގައި ކުރިން ވާދަކުރައްވާނެ ކަމަށް އިއުލާންކުރެއްވި ނަމަވެސް ފަހުން އެ ވިސްނުން ދޫކޮށްލައްވައިފަ އެވެ.

މި އިންތިހާބާއެކު އެމްޑީޕީގެ އެތެރޭގެ ވާދަވެރިކަން އޮތް މިންވަރު ވަރަށް ބޮޑަށް ހާމަވެގެންދެ އެވެ.

އެމްޑީޕީގެ ޗެއާޕާސަން ކަމުގެ ގޮނޑި ހުސްވީ އެ މަގާމަށް 2017 ގައި އިންތިހާބުކުރި ހަސަން ލަތީފްގެ ދައުރު މިދިޔަ ހޮނިހިރު ދުވަހު ހަމަވުމުންނެވެ.